"ცოდვის შვილები"

უმეტესი თქვენგანი, ალბათ, გოდერძი ჩოხელს მწერლობით იცნობთ, მაგრამ არანაკლებ მნიშვნელოვანია მისი ღვაწლი კინემატოგრაფიაში. 
მრავალწლიანი დავა ორ მხარეს შორის, რომელიც უმეტესად სისხლისღვრით მთავრდებოდა, მუდმივი შუღლი და შურისძიება.  ფილმის პროტაგონისტი ხევსური მგელიკაა, რომლის ცხოვრებაც ქისტი გორდოს დატყვევების შემდეგ იცვლება.  „ როცა პირველი ფიფქი  ჩამოვარდება, იმავ წუთს ტყვიას გკრავ“, ეუბნება იგი ქისტს, სწორედ აქედან იწყება მისი გაორება. თანამოძმეების პოზიცია კარგად ჩანს შემდეგ ფრაზაში:„ მოურჯულებელს რად არჯულებ?“ და სთხოვენ მის გაშვებას, თუმცა მგელიკა თავის აზრზეა, რომლის მიზეზადაც ასახელებს იმას, რომ წარსულში ქისტებიც იტაცებდნენ ხევსურებს და გამოსასყიდს ითხოვდნენ,შეიძლება ითქვას, რომ შურისძიება სწადია. რა თქმა უნდა, ამ ყველაფერს თვითონაც არ იჯერებს, მაგრამ ჯიუტად დგას თავის ნათქვამზე.  საბოლოოდ კი, გადაწყვეტილება იმით განამტკიცა, რომ დაიფიცა.
რა უნდა გააკეთოს ხევსურმა მგელიკამ? უარყოს და შეურაცხყოს რჯული თუ მოკლას უდანაშაულო ადამიანი?!
რამდენიმე საინტერესო დეტალი და ეპიზოდი უნდა გავიხსენო ფილმიდან. უპირველესად, მგელიკას ცოლი, რომელიც თითქმის არ იღებს ხმას და ჟესტების ენით ცდილობს, მიგვახვედროს სათქმელს. იგი, თვითონ გოდერძი ჩოხელის თქმით, ზვიადაურის ცოლს, აღაზას გვაგონებს.
ასევე განსაკუთრებით აღსანიშნავია ბოლო ეპიზოდი. მგელიკა, რომელიც ყველაფრის პასუხს სხვების თვალებში ეძებს, პასუხად კი ძირს დახრილ თვალებს მიიღებს.

ასევე ბავშვები, რომლებიც მზად არიან საკუთარი ოჯახი, რწმენა და ადგილი დაიცვან. ისინი აგრძელებენ მშობლების „მოვალეობებს“.

ბავშვების,შვილების,მომავალი თაობის თემას აჟღერებს თვით ფილმის სათაურიც, რომელიც „ალუდა ქეთელაურის“ ერთ-ერთი ეპიზოდის ალუზიაა:

“ვისაც მტერობა მასწყურდეს,
გააღოს სახლის კარია,
სისხლ დაიგუბოს კერაში,
თვითანაც შიგვე მდგარია.
……………………………………..
სისხლში დაიგოს ლოგინი,
გვერდს დაიწვინოს ცალია
ბევრი იყოლოს შვილები,
ბევრი ვაჟი და ქალია;
იქვე საფლავი გათხაროს,
იქ დაიმარხოს მკვდარია.”
ამ ყველაფერს ემატება ისიც,რომ ფილმს  ფონად გასდევს ჩვილი ბავშვის ტირილიც.
ყველაფერი უსასრულოდ მეორდება – „შენ რო სხვა მაჰკლა, შენც მოგკვლენ, მკვლელს არ შაარჩენს გვარია.“ მუდმივი გამეორება კი უმძიმესი ტვირთია.

Комментарии

Популярные сообщения